SONU KI MUMMY

SONU KI MUMMY Dilli ki ek purani government colony ki subah kuch khaas hoti hai. Galiyan abhi bhi neend mein hoti hain, lekin zindagi jagne lagti hai. Subah ke paune chhe baje, ek jhuggi ke andar ek faded si tube light tim-tima rahi hai. Stove par patile me chai ubal rahi hai, aur ek chhoti kad kathi wali , patli si aurat, jiska naam hai Mamta, jhaadu ek taraf rakh kar apne dusre kaam mein lag gayi hai. Aankhon mein neend ki thakaan liye bolti hai, “Sonu… uth ja beta… 6 baj gaye. School ka time ho gaya,” Palang ke ek kone matmele rang ki chadar mein lipta hua uska chhota beta Sonu karwatein badal raha tha. “Uniform ganda hai mummy…” Neend mein badbadate hue bolta hai sonu . “Arey tu bas brush kar. Uniform main dho ke press kar dungi na, thoda gila hoga bas.” Mamta ne uski peeth par haath phera aur jaldi se kapdon ko press karne lagi. Ghar mein pressing board nahi, ek patli si chaddar bichha kar woh floor pe hi iron karti thi. Zindagi ke har din mein ek jung ladti thi Mamta waqt se, thakaan se, aur ek aise system se jahan paisa aur position hi sab kuch tha. 7:50 baje, Sonu apni maa ke saath school gate ke paas khada tha. Shirt ka ek button latak raha tha, aur uske shoes ke aage ka leather chhil chuka tha. Lekin uske haathon mein tha tiffin maa ne do roti aur thoda sa aloo sabzi rakha tha, ek chhoti biscuit ki packet bhi daal di thi. Gate pe khade guard ne unhe rokte hue kaha, “Dekhiye madam, Principal sir ne bol diya hai bina poori uniform ke bachcha andar nahi jaayega.” Mamta ne haath jod kar kaha, “Madan Bhaiyya... tum jaante to ho main safai ka kaam karti hoon…pagar aate hi khatam ho jati hai …lekin….jaldi meri salary mil jayegi…to…. Naya dress aur joota laa dungi isko... Bas thode din ki baat hai… jaane do... ” Guard apni majboori batate hue kehta hai , “Tumko main samjaya tha na ki mat daalo ye school mein par tumko kidhar sunna hai ? sab show bazi hai. Mera mushkil ho jayega…nai jaane de sakta main” Mamta kuch nahi bolti hai... Sirf Sonu ke sir par haath rakhte hue kehti hai, “Chal beta, aaj tu chhutti kar le. Ma ke saath kaam pe chal..Haan .” Sonu maa ka haath thaam kar chala jata hai….aur jaate jaate school me dakhil hote bachhon ko mud mud ke dekhta rehta hai wo….Uska dhyan bhatkane ko Mamta use bolti hai “ Kal toone faaram bhara tha na…wo kavita ke liye…kya bolte hain use…” “Poetry competition maa”….apni ma ka pronounciation thik karte hue bolta hai Sonu….uski taraf dekhke Mamta ki aankhon me aansu aa jate hain aur seena garv se phool jata hai phir aankh ke kone se thoda sa kajal chhuta ke sonu ke mathe ke ek kone pe lagate hue Mamta bolti hai “Haan…Potry…karna beta tu khoob karna ye potry kavita….naam bada karega mera beta…chal ! Sonu uski baat sunke use kaske pakadte hue mamata ke sath sath aage badh jata hai… Mamta ka agla stop tha ek posh housing society. Flat no. 104 Mrs. Mehta ka ghar. Mamta ne bell bajayi, aur andar jaakar pocha lagana shuru kiya. Mrs. Mehta yoga mat par baithi thi, insta reel bana rahi thi jisme wo apne followers ko greet karke unke fayde ki baat bata rahi thi ki tabhi Mamta ka beta sonu uski video ke background me dikhai de jata hai ,wo darsal jhadu uthane jata hai apni ma ko dene ke liye,Uski is harket pe Mrs Mehta thoda jhalla jati hain…”ohho video pura shoot ho hi gaya tha ek min ruk jata tu…?? Jawab mein Sonu kuchh bol nahi pata kyunki wo samajh nahi pata ki hua kya hai ? Thoda aur irritate hote hue bolti hai “Hat ja bhai hat ja wahan se …let me shoot this bloody reel “ Jawab me sonu sar neeche karke bolta hai “SORRY MA’AM” Chaunk jati hai Mrs Mehta …Ohho iski English ? Mamta ise kahin English medium me padha rai hai kya ?? Tirchhi smile ke sath kaha Mrs Mehta ne… Mamta ne muskaraane ki koshish ki, “School bhejti hoon madam, par kabhi kabhi piroblem ho jaati hai kapdon ki, bookas ki…” Mrs. Mehta taana marte hue bolti hain , “Piroblem,Bookas…Bhai, ye sab tum logon ke liye nahi hota. Zyada hawa mein mat ud... ise kisi dhabe wabe pe kaam sikhwa….tere kaam ayega jab ye ghar me chaar paise layega.” Jawab mein Mamta kuch keh na saki. Uski jhukti aankhein dekh Sonu wahan se hat kar bahar chala jata hai aur Mamta chupchap aankhein neeche kar apne kaam me lag jati hai lagatar farsh ko dekhte dekhte uska man keh raha tha kabhi to kuch badlega. Ek hafte baad school mein Hindi kavita pratiyogita hone wali thi. Mamta apna do din ka kaam chhod deti hai, Har din ka paisa uske liye zaroori tha, lekin Sonu ka ek din school ke stage pe khada hona, uske liye paison se kahin badhkar tha.Ek local NGO se second-hand shoes leti hai Mamta aur ghar jaate jaate use yaad aaat hai ki ek baar gudware me seva karte waqt usey ek uncle mile the bade bhale aadmi the... Woh purani cheezein donate kiya karte the …ye sochkar Mamta ne unse baat ki. Unhone apne bete ki purani shirt nikaali jise usne bamushkil ek adh baar hi pehna tha ye ek safed shirt thi lekin kafi purani ho gayi thi ab jisse thodi faded si dikh rahi thi lekin Mamta ke liye woh shirt kisi designer piece se kam nahi thi. Wo khushi khushi us shirt ko uncle se lekar Wapas apne ghar pahunchti hai aur poore pyaar se shirt ko haathon se dhoke istri karte waqt har silvat ko ek ek karke aise thik karti jati hai jaise apni taqdir ki silvaton ko thik karne ki koshish me ho,phir Shoes ko ek kapde se saaf karke, polish karke taiyyar karke ghar ke ek kone me ache se rakh deti hai . Agli subah, Sonu taiyyar ho raha tha. Uska gala thoda sukh raha tha kyunki shayad thoda darr tha. Pehli baar poore school ke saamne bolne jaa raha tha halaanki usne apna ye dar apni ma se sajha nahi kiya,aur andar hi andar kuchh shabdon ko kai kai baar bolke khud ko abhyast karne ki koshish me khoya dikhai diya wo.School ka time nazdik aate dekh Mamata ne uske bal set kiye, uski shirt ke collars durust kiye, Fir usne Sonu ke maatha chuma aur saamne lage purine sheeshe me dekhte hue apni adat anusar apne bete ko kala tika lagaya aur bas itna boli , "Mera beta” Us din unki basti mein sab log excited the ki Mamta ka bina baap ka beta stage pe jaane wala tha. Shaam ko auditorium bhar chuka tha. Bacchon ke naye uniform chamak rahe the. Parents apne phones ready karke baithe the. Final list check ho rahi thi jismein Sonu ka naam bhi likha tha par naam ke aage likha tha (REMOVE THE NAME IF UNIFORM NOT PROPER ) Yani uniform nahi pehni hogi Sonu ne to uska name hata dena hai ,Khair kuchh ek participants ke performance ke baad Stage par naam announce hua “Sonu…” Ek koney me sikudi simti dari sehmi si khadi Mamta ke paanv chhooke stage par jata hai Sonu . Mic adjust kiya jata hai uski height ke anusaar. Sonu ek bar phir bheed me se dhoondhte hue ek pal ke liye apni maa ki taraf dekhta hai, phir poori himmat jamaa karke bolna shuru karta hai Wo kone me khadi hai Dari sehmi badi hai Door se dekh rahi hai mujhko aankhein ponchhti jaati hai Meri rooh tadap se jaati hai jab ma kaam pe baahar jaati hai Meri Ma gali bhi khati hai jab jhadu wo lagati hai Taane sunte sunte wo behri si ho jati hai Raat ko thak kar aati hai to bas mujhe dekhna chahti hai Sari taklifein chhupati hai bas thoda sa batati hai Samajhti hai ki baccha hu aur himmat tooti jaati hai par ma tujko batalu kya main apna dar dikhlaun kya Mujhe Gharib bhikhari low class Wo kehte jo hain aaspass Inke apne pariwaon se ya unke sanskaron se Yehi sikha hoga shayad inhone rishtedaaron se Par ma bhool sabhi kuchh jata hu … Jab sath me tujhko paata hu Main zor zor se hanste mein saare dukh bhoolna chahta hu Meri Jeb mein paise nahi par aankhon mein khwab hai Chhoti si jhuggi hi sahi, par ye Beta ma ka taaj hai Tooti chappal paaon mein par karna ab kuchh khas hai Paidal chalte hain abhi par bharni ab parwaz hai Sab khamosh reh jaate hain, Pehli baar kavita mein logo ne zindagi ki zubaan suni. Jury member ki aankhon mein aansu the. Ek teacher Mr. Vineet quietly is poem ka video bana rahe the.Jahan ek bachhe ne samaj ko aaina dikhaya tha apni masumiyat se.. Us raat 2 baje tak, Mr. Vineet ne video ko dekha, fir dekha, fir social media pe upload kar diya. Title diya “Aapne Sirf Uniform Dekha... Maine Uski baton mein uske masum shabdon me Maa Dekhi.” Koi hashtag nahi, koi hype nahi. Bas sacchai. Subah tak video viral ho chuka tha. College students, influencers, NGO workers sab ki aankhon mein ek hi sawal tha: “Yeh bachha kaun hai?” Instagram pe ek influencer reel banata hai “Aaj maa ke kadmon ko chho ke nikla hoon... Mamta salute.” Local MLA tweet karta hai “We are launching a program to support school uniforms for all underprivileged kids. #SunoSonuKiMummy has shaken us all.” Agle din, subah 9 baje, Mamta apni jhuggi ke bahar bartan dho rahi thi. Ek officer-type aadmi aur principal unki gali mein jate hain jinhein dekhke log confuse ho jate hain. Darasal wo Sonu ke school ke Principal the jo aake haath jodte hue Mamta se kehte hain, “Mamta ji, humein maaf kijiye. Humne aapki majboori nahi, status dekha. Par aap ne samjha diya, sapne status nahi dekhte.” Mamta thoda ghabra jati hai, “Par maine kya kiya sir? Bas usko school bhejne ki koshish ki…” “Wahi toh kiya,” principal ne muskaraake kaha, “jo desh ki har maa ko karna chahiye. Sonu ab school ka nahi, poori society ka beta hai.” Ek hafte baad school mein ek function organise hua. Banner laga “Salute to Supermom: Mamta.” Pehle stage pe Sonu ko bulaya gaya. Uske haath mein ek naya school bag tha. Us bag par likha tha “Dreams Don’t Need Riches, Just a Mother’s Will.” Phir Mamta ko bulaya gaya. Us waqt Mrs. Mehta bhi khadi thi. Pichhle taanon ka bojh uske chehre pe tha. Usne aake Mamta ko gale lagaya, “Mujhe maaf kar do “ Mamta uski taraf jodte hue stage pe jaati hai jahan Mamta ke aankhon mein aansu aa jate hain,wo bolti hai, “Main to sirf ek maa hoon. Sapna tha ki mera beta padhe. Mere paas paise nahi the... par umeed thi, aur ye here jaisa mra beta jo kehta kuchh nahi tha kabhi par us din isne sabko kuchh kuchh kaha…kaise kaha…bas..isse jyada bolna mereko pata nahi.. Ek mahine baad, Mamta ne ek NGO ke saath milkar ek initiative chalu kiya “Maa Ki Pathshala” jahan working moms apne bacchon ke saath basic padhna likhna seekhti thi. Ek wall thi “Wall of Sharing” — jahan koi bhi kapde, books donate kar sakta tha. Bina sharam ke. Har Sunday Sonu aur kuch aur bacche poetry aur public speaking sikhate the.Ek raat, Mamta aur Sonu chhat pe lete the, taare ginte hue. “Mummy, main bada ho ke kya banunga?” Sonu ne poocha. “Bas ek accha aadmi ban. Jo kisi ko kabhi chhota na samjhe aur sabke liye kuchh kare,” Mamta ne muskurate hue jawab diya. Asmaan ke taaron ke beech jaise tare unse keh rahe ho : Suno tum sab log ye jo Sonu Ki Mummy hai na…bas aisi hi kai maa hain,Har gali mein ek Mamta hai, Jo thodi izzat chahti hai thoda pyar aur bas thoda sa support : DOGEY TUM LOG .” (THE END)