RUBANI,ARJUN,AADITYA AUR AANIYA KI JADUI KAHANI

Ek chhoti si colony thi, jahan har shaam char dost milke khelte the Rubani, Arjun, Aditya aur Aaniya. Ek din tez baarish ke baad aasman mein ek bada sa rainbow nikla. Lekin yeh rainbow alag tha yeh hilta-dulta nahin, balki ek jadui pul ki Tarah chamak raha tha. Aaniya ne aankhein badi karke bola “Arre! Yeh toh pul lag raha hai!” Aditya bhi bola “Chalo chalte hain upar, dekhte hain kahaan le jaata hai.” Rubani to waise bhi hamesha adventure ke mood mein rehti thi “Ho sakta hai yeh rainbow humein ek naya magical world dikhaye!” Aur Arjun muskurate hue bola “Toh chalo sab haath pakad lo… hum saath-saath chalenge.” Charon dost ne ek doosre ka haath pakda aur rainbow par chalne lage. Rainbow unke kadam padte hi aur zyada chamakne laga. Pul ke doosre paar ek jadui duniya thi Pedon par mithaiyan aur candies latak rahi thi …..Kuchh Nadiyon mein lemon juice to kuchh mein mango shake aur kuchh me chocolate milk beh raha tha ,Aur janwar bol rahe the! Unhe dekh kar Ek neela khargosh kudta hua aaya aur bola “Bachcho! Hamare rainbow ke rang feeke pad gaye hain. Sirf tum jaise dil ke saaf aur himmatwale dost hi ise wapas rangin bana sakte ho.” Sab ne haan mein sir hilaaya. Rubani ne khush hokar zor se ek pyara sa gaana gaaya… aur rainbow ke laal aur orange rang chamak uthe. Aditya ne ek masti bhara joke sunaya… aur peela rang chamak gaya. Aaniya ne hawa mein apni ungli se ek dil banaya… usse hara aur neela rang aa gaya. Arjun ek lambi candy lekar tree par chadh gaya aur ek chamakta hua star-fruit tod laya… usse jamni aur gulabi rang bhi laut aaye. Rainbow fir se saare rangon se bhar gaya Saari jadui duniya chillayi – “Yayyy! Hamara rainbow wapas aa gaya!” Aur dheere-dheere woh pul unhe unki basti mein wapas le aaya. Charon ne ek doosre ki taraf dekha, muskuraye… aur decide kiya ki yeh unka chhupa hua secret rahega. Tab se jab bhi aasman mein rainbow nikalta… woh chaaro jaante the ki yeh unka apna rainbow hai, jo sirf unke liye aur zyada chamakta hai